Sheeshon Ka Maseeha Koi Nahin

Moti ho kay sheesha, jaam, kay dur

jo toot gaya so toot gaya

Kab ashkon se jurd sakta hai

jo toot gaya, so chhoot gaya

Tum na-haq sheeshay chun chun kar

daaman mein chhupaye baithey ho

Sheeshon ka maseeha koi nahin

kya aas lagaye baithey ho

Shayad kay inhi tukrdon mein kahin

wo sagar-e-dil hai, jis mein kabhi

Sud naaz se utra karti thi

Sahba-e-gham-e-jaanaan ki pari

Phir duniya walon ne tum se

Ye sagar le kar phod diya

Jo maye thi baha di mitti mein

Mehmaan ka shah par tod diya

Ye rangeen rezay hain shayed

un shokh biloori sapnon kay

Tum mast jawani mein jin se

Khalwat ko sajaya kartey thay

naadaari, dafter, bhookh aur gham

un sapnon se takratey rahay

be-reham tha chau-mukh pathraav

yeh kaanch kay dhanchey kia kartey?

Ya shayad in zarron mein kahin

moti hai tumhari izzat ka

woh jiss se tumharey ijz pe bhi

shamshad qadon nay rashk kia

is maal ki dhun mein phirtey thay

tajer bhi bohat rehzun bhi kaee

ai chor-nagar ya muflis ki

gar jaan bachi to aan gai

ye sagar sheeshe, laal-o-guhar

saalim hon to qeemat paate hain

yun tukrde tukrde hon to faqat

chubhte hain, lahoo rulwaate hain

yaadon ke girebaanon ke rafoo

par dil ki guzar kab hoti hai ?

ik bakhiya udheyrda, ek siya

yun umr basar kab hoti hai ?

is kaar-gahey hasti mein jahan

ye sagar sheeshay dhaltey hein

har shaey ka badal mil sakta hai

sab daaman pur ho saktey hein

Jo haath bardhey yawar hai yahan

jo aankh uthhey woh bakhtawar

yaan dhan daulat ka ant nahin

hon ghaat mein daaku lakh magar

kab loot jhapat se hasti ki

dukaanein khaali hoti hein

yaan parbat parbat heerey hein

yaan saagar saagar moti hein

Kuch log hein jo is daulat par

Pardey latkatey phirtay hein

Har parbet ko, har saagar ko

Neelam chardhaatey phirtey hein

Kuchh woh bhi hein jo laRh bhiRd kar

ye pardey noch giraatay hein

Hasti kay utthai giron ki

har chaal uljhaaye jatey hein

In donon mein run pardta hai

Nit basti basti, nagar nagar

Har basti ghar ke seene mein

Har chalti rah ke maathe par

Ye kalak bhartey phirte hein

Woh jot jagate rehte hein

Ye aag lagatey phirtey hein

Woh aag bujhatay rehtey hein

Sab saagar sheeshay laal o guhar

is baazi mein bid jaate hein

Uttho sab khaali haathon ko

us run se bulaway aate hein

is kaar-gahey hasti mein jahan

ye sagar sheeshay dhaltey hein

har shaey ka badal mil sakta hai

sab daaman pur ho saktey hein :)